via Programmer's Diary by ညီညီ(သံလွင်) on 5/7/08
နာဂျစ်မုန်တိုင်းဒဏ်ကို အလူးအလဲ ခံခဲ့ရသော မြန်မာနိုင်ငံတွင် လူအသေအပျောက်စာရင်းများ နေ့စဉ် တိုးပွားလျက်ရှိခြင်းမှာ စိတ်မကောင်းဖွယ်ရာ ဖြစ်သည်။ လူသားခြင်း စာနာထောက်ထားသည့် အကူအညီများကို ပေးရန် နိုင်ငံတကာမှ ကြိုးပမ်းနေကြသည်။ မြန်မာ စစ်အစိုးရအနေဖြင့် မုန်တိုင်းဒဏ်ကြောင့် သေကြေပျက်စီးကြသည်ကို အရေးမစိုက်အားဘဲ မေလ(၁၀)ရက်နေ့တွင် ကျင်းပမည့် လူထုဆန္ဒခံယူပွဲကို ပြုလုပ်ရန်သာ စိတ်အားထက်သန် နေခြင်းမှာ လူမဆန်သည့် အပြုအမူ ဖြစ်သည်။ မုန်တိုင်းဒဏ်ခံရသည့် ဒေသများတွင် ကျင်းပမည့် လူထုဆန္ဒခံယူပွဲများကို မေလ (၂၄) ရက်သို့ ရွှေ့ဆိုင်းခဲ့သည်ကို ကြည့်ခြင်းအားဖြင့် မေလ (၂၄) ရက် မတိုင်မီမုန်တိုင်းဒဏ်သင့် ပြည်သူများ ပုံမှန် အခြေအနေသို့ ပြန်လည်ရောက်ရှိအောင် စစ်အစိုးရမှ လုပ်ဆောင်ပေးနိုင်လိမ့်မည်ဟု သွေးနားထင် ရောက်နေပုံရသည်။ အမေရိကန်၊ ဥရောပနိုင်ငံများနှင့် အခြားသော နိုင်ငံများမှ အကူအညီ ထောက်ပံ့မှုများကို အပူတပြင်း လိုအပ်နေသော်လည်း ထိရောက်သည့် အကူအညီများပေးရန် လိုအပ်သည့် စူးစမ်းလေ့လာမှုများ ပြုလုပ်မည့် ရှေ့ပြေးအဖွဲ့များ၏ ပြည်ဝင်ခွင့်ဗီဇာများကို လျင်မြန်စွာ ဆောင်ရွက်ပေးခြင်း မရှိဘဲ နှောင့်နှေးလျက် ရှိခြင်းကြောင့် နိုင်ငံတကာမှ အားမလို အားမရဖြစ်ကာ စစ်အစိုးရကို ဖိအားပေးနေကြသည်။ မုန်တိုင်းဒဏ်သင့်ရာ ဒေသများရှိ လမ်းများ၊ တံတားများ စသည်တို့ ပျက်စီးယိုယွင်းခြင်းကြောင့်
လမ်းပန်းဆက်သွယ်မှု ခက်ခဲကာ အကူအညီများ အချိန်မီ ထိထိရောက်ရောက် မပေးနိုင်ဘဲ ရှိနေသည်။ ထိုသို့သော အခြေအနေမျိုးတွင် ထောက်ပံ့ကူညီမှုများ ပေးပို့နိုင်ရန် အတွက် စွမ်းရည်ပြည့်ဝသည့် ရဟတ်ယာဉ်များ အမြောက်အမြား လိုအပ်သည်။ မြန်မာစစ်အစိုးရတွင် လုံလောက်သည့် ရဟတ်ယာဉ် အလုံအလောက် မရှိပေ။ အမေရိကန် သမ္မတ ဂျော့ဘုရ်ှက မြန်မာစစ်ဗိုလ်ချုပ်များအား ဘေးဒုက္ခရောက်နေသည့် မြန်မာပြည်သူများအား ကူညီခွင့် ပြုပါဟု ကမ်းလှမ်း လာခဲ့သည်။ လေယာဉ်များ၊ ရဟတ်ယာဉ်များ၊ မရိန်းတပ်သားများ တင်ဆောင်လာသည့် အမေရိကန် စစ်သင်္ဘောများကလည်း ထိုင်ဝမ်နှင့် ပူးပေါင်းပြီး သဘာဝဘေးအန္တရာယ် ကာကွယ်ရေး လေ့ကျင့်မှု ဆောင်ရွက်နေရာမှ ထိုင်းနိုင်ငံသို့ ရောက်ရှိကာ အသင့်စောင့်ဆိုင်း နေပြီဖြစ်သည်။ အမေရိကန်က ၀င်ရောက် သိမ်းမည်ကို စိုးသဖြင့် အစိုးရိမ်လွန်ကြောက်ရွံ့ကာ နေပြည်တော်သို့ ပြောင်းရွှေ့ခဲ့သော စစ်ဗိုလ်ချုပ်များအနေဖြင့် ယခုကဲ့သို့ အမေရိကန်မှ အကူအညီ ပေးရန် ကမ်းလှမ်းလာသည့် အခါ ဆုပ်လည်းစူး စားလည်းရူး အခြေအနေတွင် ရောက်ရှိနေသည်။
မြန်မာစစ်အစိုးရ အားထားသည့် တရုတ်နိုင်ငံအနေနှင့် အကူအညီ ဒေါ်လာတစ်သန်းနှင့် ၅ သန်းတန်ဖိုးရှိ ပစ္စည်းများ လှူဒါန်းမည်ဟု ကြေညာခဲ့သော်လည်း ၄င်းမှာ အဝေးရောက်ကူညီမှုသက်သက်သာ ဖြစ်ပြီး အမေရိကန်ကဲ့သို့ ထိရောက်သည့် လက်ကမ်းကူညီမှုများ ပြုလုပ်ကမ်းလှမ်းရန် ပျက်ကွက်ခဲ့သည်မှာ အံ့သြဖွယ်ရာ ဖြစ်သည်။ တရုတ်နိုင်ငံကသာ အမေရိကန်ကဲ့သို့ ကမ်းလှမ်းလာမည် ဆိုပါက စစ်ဗိုလ်ချုပ်များ အနေနှင့် ၀မ်းမြောက်ဝမ်းသာ လက်ခံမည်မှာ မြေကြီးလက်ခတ်မလွဲ ဖြစ်သည်။ သို့သော်
လက်ရှိ အခြေအနေက စစ်အစိုးရအတွက် အခက်တွေ့စေသည်။ အမေရိကန်၏ အကူအညီပေးရန် ကမ်းလှမ်းလာမှုကို ပယ်ချလိုက်ပါက မုန်တိုင်းဒဏ်ခံဒေသမှု ပြည်သူများကို ကယ်ဆယ်ထောက်ပံ့ရေး ပြန်လည်ထူထောင်ရေး လုပ်ငန်းများ ပြုလုပ်ပေးရာတွင် ဆုံးရှုံးနစ်နာမှု အလွန် ကြီးမားမည်မှာ အသေအချာဖြစ်သည်။ စစ်အစိုးရ အနေဖြင့် တရားသေ စွဲကိုင်လာသော အမေရိကန် ဆန့်ကျင်ရေး မူဝါဒအရ ပြည်သူများ၏ မျက်လုံးတွင် အမေရိကန်ကို ကယ်တင်ရှင်များအဖြစ် မြင်သွားမည်ကို မလိုလား။ အမေရိကန်သည် အခြားနိုင်ငံများ၏ ပြည်တွင်းရေးတွင် ၀င်ရောက်စွက်ဖက်လေ့ရှိသည့် နိုင်ငံတစ်ခု၊ လက်ဝါးကြီးအုပ် စိုးမိုးလိုသည့် ခေတ်သစ်နယ်ချဲ့နိုင်ငံတစ်ခု ဟုသာ
မြင်စေလိုသည်။ ထို့အပြင် အမေရိကန်၏ အကူအညီကို လက်ခံကာ မြန်မာပြည်တွင်းသို့ ၀င်ရောက် ကူညီခွင့် ပေးလိုက်ပါက နဂိုကတည်းက စစ်အစိုးရကို ရွံရှာမုန်းတီးကာ အမေရိကန်တပ်များကို မျှော်လင့်တောင့်တနေကြသည့် မြန်မာပြည်သူများအတွက် အားကိုးရာဖြစ်လာလိမ့်မည်ကို စိုးရိမ်စိတ်လွန်ကဲ နေကြသည်။ မုန်တိုင်းဒဏ်ခံ ပြည်သူများကို ကူညီရန် ရောက်လာမည့် အမေရိကန် အကူအညီများ အားကိုးဖြင့် ဆန္ဒပြမှုများ ထပ်မံ ဖြစ်ပွားလာပြီး အဆုံးတွင် အာဏာကို လက်လွှတ်ရမည်ကို တွေးမိကြပေမည်။ ထို့ကြောင့် အာဏာ တည်မြဲရေးကိုသာ အစဉ်တစိုက် အရေးပေးခဲ့သည့် မြန်မာစစ်ဗိုလ်ချုပ်များ အနေဖြင့် မြန်မာပြည်သူများ ထောင်ပေါင်းများစွာ သေကြေပျက်စီးပြီး သန်းနှင့်ချီကာ အိုးမဲ့အိမ်မဲ့ ဖြစ်ကြသည့် အရေးထက် ၄င်းတို့ အာဏာလက်မလွှတ်ရရေး အတွက် အကြံအိုက်နေကြသည်။ သေချာသည်ကတော့ မြန်မာ စစ်အစိုးရ အနေဖြင့် လက်ရှိအခြေအနေတွင် ဆုပ်လည်းစူး စားလည်းရူး အခြေအနေသို့ ရောက်နေခြင်း ဖြစ်သည်။ အမျိုးသားဒီမိုကရေစီအဖွဲ့ချုပ်နှင့် ပြည်တွင်း ပြည်ပရှိ အခြားသော နိုင်ငံရေးအဖွဲ့အစည်းများ အနေဖြင့် နိုင်ငံတကာ အာရုံစိုက်မှုများ ရရှိနေသော ယခုလို အချိန်အခါတွင် စစ်အစိုးရအခက် မြန်မာပြည်သူအချက်ဟု သဘောထားကာ လိုအပ်လျှင် လိုအပ်သလို နိုင်ငံရေး ရေချိန် မြှင့်တင်နိုင်ရန်အတွက် ကြိုတင် ပြင်ဆင်မှုများ ပြုလုပ်ထားသင့်ကြောင်း တိုက်တွန်း လိုက်ရပါသည်။
ညီညီ(သံလွင်)
0 comments:
Post a Comment