ရခိုင်ပင်လယ်ပြင်တွင် ရောင်းတန်းဝင် ငါးများနှင့် ရေငန်ပုစွန် ဖမ်းယူရရှိမှု လျော့ကျလာ

Ref: မောင်ရမ္မာ(နိရဉ္စရာ) 2/25/2008
မြန်မာနိုင်ငံ ရခိုင်ကမ်းလွန်ပင်လယ်ပြင်တွင် ရောင်းတန်းဝင် အရွယ်အစား ငါးများ ဖမ်းဆီးရမှုမှာ အလွန်လျော့ကျလျှက်ရှိကြောင်းနှင့် တန်းမ၀င်ငါးများနှင့် အဆင်မမှီ ငါးများကိုသာ ဖမ်းဆီးရရှိနေသဖြင့် ရခိုင်ကမ်းရိုးတန်းတွင် ကျက်စားနေကြသော တန်ဖိုးရှိ တန်းဝင်ငါးများ၏ အနာဂတ် စိုးရိမ်ဖွယ်ရာ အခြေအနေသို့ ရောက်ရှိ်နေကြာင်း သတင်းရရှိသည်။

ငါးသလောက်များနှင့် ငါးမုတ်အပါအ၀င် အရွယ်အစားသေးငယ်သော ငါးမျိုးစုံ ငါးများကိုသာ ဖမ်းဆီးရမိနေပြီး တန်းဝင် အမျိုးအစားကောင်း ငါးများမှာ မရှိသလောက် ရှားပါးလာနေကြောင်း မြန်မာနိုင်ငံ ငါးလုပ်ငန်းအဖွဲ့ချုပ် သားငါးကဏ္ဍဆိုင်ရာဌာနမှ ထုတ်ပြန်သော သတင်း တပုဒ်အရ သိရှိရသည်။

အလားတူ ရခိုင်ပြည်နယ်တွင် ရေငန်ပုစွန်ဖမ်းဆီးရရှိမှုမှာလည်း တနှစ်ထက်တနှစ် များစွာလျော့ကျလျှက်ရှိ ကြောင်း ငါးဖမ်းလုပ်ငန်းကဏ္ဍဆိုင်ရာ အမည်မဖေါ်လိုသူ လုပ်ငန်းရှင်တဦးက ပြောသည်။

သူက “အဲဒီလို ရောင်းတန်းမ၀င်တဲ့ ငါးတွေများလာတာ၊ ဖမ်းဆီးရရှိမှု နည်းပါးလာတာတွေဟာ တခြားနိုင်ငံ တွေလို ငါးမဖမ်းရတဲ့ အချိန်ကိုသတ်မှတ်ပီး ကြိုတင်ကာကွယ်မှုတွေမရှိလို့ ဒီလိုပြုန်းတီးလာရ တာဖြစ်တယ်။ ခုဆိုရင် ရခိုင်ရေငန်ပုစွန် ဖမ်းဆီးရရှိမှုဟာလည်း အံ့မခန်းလောက်အောင် ကျဆင်းနေတာ တွေ့နေရပါတယ်”ဟု ပြောသည်။

မြန်မာနိုင်ငံတွင် အက်ဒမန်ပင်လယ်ပြင်၌ ကျက်စားသည့် ငါးသလောက်အမျိုးအစားနှင့် ရခိုင်ကမ်းရိုးတန်းတွင် ကျက်စားသည့် ငါးသလောက်ဟူ၍ နှစ်မျိုးနှစ်စားရှိရာ ယခုအခါ ရခိုင်ကမ်းရိုးတန်းတွင် ငါးသလောက် အကြီးစားများ ရှာဖွေ မရရှိဘဲ ရောင်းတန်းမ၀င်သည့် အသေးစား ငါးသလောက်များကိုသာ ဖမ်းဆီးရမိကြောင်း ငါးလုပ်ငန်း ဂိုဒေါင်ပိုင်ရှင် တဦးက ပြောသည်။

အဆိုပါ ငါးဖမ်းယူရရှိမှု လျော့ကျခြင်းနှင့်ပတ်သက်၍ ငါးကုန်သည်တဦးက “ မြန်မာနိုင်ငံမှာ ရေပေါ်ငါးတွေကိုသာ ဖမ်းခွင့်ပြုထားပေမယ့် တံငါသည်တွေ၊ ဖက်စပ်လုပ်ကိုင်နေတဲ့ နိုင်ငံခြားငါးဖမ်းလှေတွေက ပိုက်စိပ်စိပ်တွေနဲ့ ရေအောက်မှာရှိတဲ့ငါးတွေကိုပါ ဖမ်းနေကြတယ်။ နောက်ပီး ငါးမြစ်တွေ ကြီးပြင်းတဲ့ ရေစီးကြောင်းတွေမှာ ဘုံကျောင်းလို့ခေါ်တဲ့ ပိုက်တွေနဲ့ ဖမ်းနေတာကြောင့် ဒီလို ငါးတွေပြုန်းတီးရတာပါ။” ဟု ပြောသည်။

မြန်မာနိုင်ငံတွင် ရခိုင်ကမ်းမြောင်ဒေသနှင့် တနင်္သာရီ ကမ်းရိုးတန်းဒေသများသည် ငါး ပုစွန် အထွက်ဆုံးဒေသများဖြစ်သော်လည်း ယခုအခါ ငါး ပုစွန်ထွက်နှုန်းမှာ တဖြည်းဖြည်း လျော့ကျ လျှက်ရှိကြောင်း စုံစမ်းသိရှိရသည်။

ယခုကဲ့သို့ ရခိုင်ပင်လယ်ပြင်တွင် သားငါးပုဇွန်များ အထွက်နုန်းလျော့ကျသွားခြင်းမှာ ခေတ်မှီ စက်ကရိယာများကို အသုံးပြုပြီး ဂတ်(စ်)ရှာဖွေ တူးဖေါ်နေမှုများနှင့်လည်းသက်ဆိုင်မှု ရှိနိုင်ကြောင်း သို့သော်လည်း သက်ဆိုင်ရာ ငါးလုပ်ငန်း အဖွဲ့ချုပ်မှ အရေးယူခံရမည်ကို စိုးရိမ်၍ အဆိုပါ အချက်အလက်ကိုမူ သတင်းထုတ်ပြန်ချက်တွင် ထည့်သွင်း ဖေါ်ပြခြင်း မရှိကြောင်း လေ့လာသူ တဦးက ပြောသည်။