မြန်မာ့ငါးတန်များကို ရုရှားသို့ အမြောက်အမြားတင်ပို့ရန်စီစဉ်

Ref : Irrawaddy ကြည်ဝေ/ရန်ကုန် | မတ် ၃၊ ၂၀၀၈
အိတ်စပို့ဈေးကွက်မရှိသောကြောင့် ဈေးအနည်းငယ်သက်သာစွာဖြင့် စားသုံးနိုင်သော မြန်မာ့ငါးတန်များကို ရုရှားနိုင်ငံသို့ ပုံမှန်တင်ပို့ရောင်းချတော့မည်ဖြစ်ကြောင်း သိရသည်။

မြန်မာ့ငါးတန်များမှာ အခြားသောသားငါးများထက် ဈေးသက်သာသဖြင့် အခြေခံလူတန်းစားများ အများအပြား စားသုံးလေ့ ရှိသည့်ငါးအမျိုးအစားဖြစ်သည်။

“ငါးတန်အသားလွှာတွေကို တလတန်ချိန်နှစ်ထောင်အထိ ရုရှားကို လစဉ်ပုံမှန်ပို့ပေးရလိမ့်မယ်။ မတ်လထဲမှာ စပြီးတင်ပို့နိုင် မှာပါ” ဟု မြန်မာနိုင်ငံငါးလုပ်ငန်းရှင်များအသင်း ဒုတိယဥက္ကဌဦးကြီးငွေက ဆိုသည်။

ယခင်ဈေးကွက်ခက်ခဲနေသော ငါးတန်များကို ရုရှားနိုင်ငံသို့ လစဉ်တင်ပို့နိုင်ရေးအတွက် နှစ်ဘက်နားလည်မှု စာချုပ်ကို ဖေဖော်ဝါရီ ၁၆ ရက်နေ့က ရေးထိုးခဲ့ကြောင်း သိရသည်။ အဆိုပါလက်မှတ်ရေးထိုးရာတွင် မြန်မာ့ငါးတန် အသားလွှာများ သာမက မြန်မာ့ရေထွက်ပစ္စည်းများကိုပါ ပုံမှန်လစဉ်ဝယ်ယူရန် အစီအစဉ်ရှိကြောင်း ပါရှိသည်။

“သူတို့လိုချင်တဲ့ တလတန် ၂၀၀၀ ကိုတော့ စစချင်းပို့စမှာ အခက်အခဲရှိတယ်။ ပထမလမှာတော့ တန် ၂၀၀ လောက်ပဲ ပို့နိုင်ပါလိမ့်မယ်။ ဒါပေမယ့် အမြန်ဆုံး သူတို့လိုအပ်တဲ့ ပမာဏရအောင် လုပ်ဆောင်သွားကြမှာပါ” ဟု အသင်း၏ ဒုတိယ ဥက္ကဌက ပြောသည်။

ရုရှားသို့ ပုံမှန်တင်ပို့နိုင်ရေးအတွက် ငါးမွေးမြူရေးလုပ်ငန်းရှင်များအနေနှင့် ငါးတန်များတိုးချဲ့မွေးမြူသွားကြရန် စီစဉ်လျက် ရှိရာ မွေးမြူကာလအနေဖြင့် ၁၀ လအချိန်ယူရမည်ဖြစ်ကြောင်း ၎င်းက ဆိုသည်။

ရှရှားနိုင်ငံမှ လိုအပ်သော ပမာဏပြည့်မီနိုင်ရေးအတွက် မတ်လဆန်းမှ စတင်ကာ ယခုမွေးမြူမည့် ငါးတန်များ ကန်ဖော်မည့် ၁၀ လမတိုင်ခင် အချိန်ထိ ပြည်တွင်းဈေးကွက်အတွင်း ငါးတန်ရောင်းချမှုကို ကန့်သတ်သွားတော့မည် ဖြစ်ကြောင်း ရန်ကုန် သီရိမင်္ဂလာဈေး ငါးဒိုင်များ၏ ပြောပြချက်အရ သိရသည်။

လက်ရှိ မြန်မာနိုင်ငံတွင် ပြည်တွင်းငါးထုတ်လုပ်မှု ကျဆင်းလျက်ရှိနေပြီး ငါးစားသုံးမှု ဖူလုံရေးကို အနည်းငယ်ထိခိုက်နေ သည်ဟု ကြားသိရသည်။ ယခုအခါ အခြေခံလူတန်းစားများ အများဆုံးစားသုံးလျှက်ရှိသော ငါးတန်များကို တန်ချိန် အမြောက်အမြားတင်ပို့ပါက ပြည်တွင်းဈေးကွက်အတွင်း ဈေးအဆမတန် မြင့်တက်လာနိုင်ပြီး အခြေခံလူတန်းစားများ အတွက် ငါးစားသုံးမှုကို ထိခိုက်လာနိုင်ကြောင်း သီရိမင်္ဂလာ ငါးဈေးမှ ငါးလုပ်ငန်းရှင်များက သုံးသပ်ကြသည်။

“ငါးတန်က အသားများပြီး ဈေးသက်သာတော့ ဆင်းရဲသားတွေ တော်တော်များများ စားကြတာများတယ်။ ငါးမြစ်ချင်းထက် ငါးတန်ကိုပိုပြီးစားကြတယ်။ ငါးမြစ်ချင်းက ဈေးနည်းနည်းပိုတဲ့အပြင် အရိုးများတော့ အသားများတဲ့ငါးတန်ကိုပိုစားကြတယ်” ဟု သိရိမင်္ဂလာဈေးရှိ ငါးလုပ်ငန်းရှင်တဦးက ပြောသည်။

လက်ရှိ ငါးဈေးမှာ ငါးမြစ်ချင်း၊ ငါးကြင်း၊ ငါးတန်၊ ငါးရံ့၊ ငါးခူအပါအ၀င် အနိမ့်ဆုံး တပိဿာလျင် ကျပ် ၂၅၀၀ ဈေးရှိပြီး၊ အမြင့်ဆုံးမှာ တပိဿာလျင် ကျပ် ၄၅၀၀ ထိဈေးရှိကြောင်း သိရသည်။ ၂၀၀၆ ခုနှစ်က ငါးဈေးမှာ အမြင့်ဆုံးတပိဿာလျင် ကျပ် ၃၀၀၀ ၀န်းကျင်ခန့်ရှိပြီး အနိမ့်ဆုံး ၁၅၀၀ သာရှိကြောင်း သိရသည်။

မြန်မာနိုင်ငံတွင် ကြက်သား၊ ၀က်သား၊ ဆိတ်သား စသည့် အသားဈေးများကြီးမြင့်လျက်ရှိသောကြောင့် အခြေခံလူတန်းစား အများစုမှာ ဈေးသက်သာသောငါးကိုပင် အသားအစား စားသုံးနေကြရသည်။ ဈေးသက်သာသော ပင်လယ်ငါးအပါအ၀င် မွေးမြူရေးငါးများကို စားသုံးသူများမှာ မြန်မာတနိုင်ငံလုံးရှိ လူဦးရေ၏ ၈၀ ရာခိုင်နှုန်းခန့်ရှိကြောင်း ငါးလုပ်ငန်းဦးစီးဋ္ဌာန ဈေးကွက်စစ်တမ်းအရ သိရသည်။

လက်ရှိပြည်တွင်း ငါးထုတ်လုပ်မှုမှာ ဖောက်ပြန်လျှက်ရှိသောရာ သီဥတုအခြေအနေ၊ မြင့်တက်လာသော အစာဈေးနှုန်းများ နှင့် အထွေထွေစရိတ်စကများကြောင့် ကျဆင်းလျက်ရှိကြောင်းသိရသည်။ ငါးမွေးမြူရေး လုပ်ငန်းများတွင် ရင်းနှီးမြှုပ်နှံမှု ကုန်ကျစရိတ်အနေနှင့်မူ လွန်ခဲ့သော သုံးနှစ်ခန့်နှင့်နှိုင်းယှဉ်ပါက နှစ်ဆခန့် မြင့်တက်လာသဖြင့် ငါးမွေးမြူရေးလုပ်ငန်းရှင် များက လျှော့မွေးလာကြကြောင်း ငါးမွေးမြူထုတ်လုပ်ရေး လုပ်ငန်းရှင်များ အသင်း၏ အဖွဲ့ဝင်တဦးက ပြောကြားသည်။

“တဧက ထုတ်လုပ်မှုကုန်ကျစရိတ်က ၂၀၀၅ ခုမှာ ကျပ် ၂၅ သိန်းလောက်ပဲ ကုန်ပေမယ့် ခုချိန်မှာ ၄၅ သိန်း လောက်ဖြစ် သွားပြီ။ အရင်းအနှီးမတတ်နိုင်ကြတော့ ငါးမွေးသူတွေကလည်း လျှော့မွေးလာကြတယ်။ ငါးကန်တွေ ထုတ်လုပ်မှု ကျဆင်း ကုန်မှာတော့တွက်လို့ရတယ်။ ၂၀၀၅ နဲ့ ၂၀၀၇ ဆိုရင် မွေးမြူနှုန်း ထက်ဝက်လျော့သွားတယ်၊ ၂၀၀၈ မှာလည်း ထွက်နှုန်း တိုးလာဖို့ မမြင်ဘူး” ဟု ၎င်းကဆိုသည်။

ကုန်းတွင်းအင်းအိုင်များမှ ငါးထုတ်လုပ်မှုမှာလည်း ယခင်သုံးနှစ်ကာလထက် ကျဆင်းသွားသည်ကို တွေ့မြင်ရ ကြောင်း ငါးလုပ်ငန်းဦးစီးဋ္ဌာနမှ တရားဝင် ထုတ်ပြန်ချက်အရ သိရသည်။

ငါးလုပ်ငန်းဦးစီးဋ္ဌာန၏ စာရင်းများအရ လွန်ခဲ့သော ၂၀၀၇ ဒီဇင်ဘာလအတွင်း အင်းအိုင်ငါးလုပ်ငန်းများမှ ထုတ်လုပ်မှုသည် စုစုပေါင်း ပိဿာချိန် ၄၅ သိန်းခန့်ရှိသည်ကိုတွေ့ရပြီး ၂၀၀၆ ဒီဇင်ဘာလက ထုတ်လုပ်ခဲ့သော ပမာဏမှာ ပိသာချိန် ၅၆ သိန်းရှိသည်ကို တွေ့ရသည်။

၂၀၀၇ ခုနှစ်တွင် ပြည်တွင်းရှိ နေရာဒေသအတော်များများ၌ ရေကြီးမှုများ ဖြစ်ပေါ်ခဲ့သောကြောင့် ငါးမွေးမြူကန် ဧကပေါင်း ၁၇၀၀၀ ကျော် ရေလွှမ်းခံခဲ့ရသဖြင့် အင်းအိုင်များမှ ငါးအမြောက်အမြား ဆုံးရှုံးခဲ့ရကြောင်း အဆိုပါဋ္ဌာနမှ လက်ထောက် ညွှန်ကြားရေးမှူးတဦးက ပြောကြားသည်။

မြန်မာနိုင်ငံတွင် ငါးမွေးမြူရေးကန်စုစုပေါင်း ၂၁၄၃၅၁ ဧကရှိပြီး ထိုအထဲမှ ၅၀ ရာခိုင်နှုန်းမှာ ဧရာဝတီတိုင်းမှ ဖြစ်ကြောင်း၊ ငါးလုပ်ငန်းဦးစီးဋ္ဌာန၏ စာရင်းများအရ သိရသည်။ ငါးမွေးမြူရေးကန်များ၏ လက်ရှိထုတ်လုပ်နိုင်မှုမှာ တဧကလျှင် ပိဿာချိန် ၂၀၀၀ ကျော်ခန့်ရှိကြောင်း သိရသည်။

ယခင်ဘဏ္ဍာနှစ်တွင် ပြည်ပသို့တင်ပို့ရောင်းချခဲ့ရာ နိုင်ငံခြားငွေ အမေရိကန်ဒေါ်လာ ၇၃ သန်းရရှိခဲ့ပြီး ယခုနှစ်အတွက် သန်း ၁၂၀ ကျော်ရရှိနိုင်ရေး ရည်မှန်းဆောင်ရွက်လျက်ရှိကြောင်း သိရသည်၊။

မြန်မာ့ရေထွက်ပစည်းများကို တရုတ်၊ စင်ကာပူ၊ မလေးရှားနှင့် ဘင်္ဂလားဒေ့ရ်ှနိုင်ငံများသို့ နှစ်စဉ် တင်ပို့နေရကြောင်း သိရသည်။

ပြည်ပနိုင်ငံများသို့ မြန်မာ့ရေထွက် ပစ္စည်းတင်ပို့နိုင်ရန်အတွက် ပြုပြင်ထုတ်လုပ်သည့် စက်ရုံပေါင်း ၁၃၅ ရုံရှိပြီး ၃၅ ရုံမှာ အီးယူဈေးကွက်သို့ တင်ပို့ခွင့်ရခဲ့ကြောင်း ငါးလုပ်ငန်းဦးစီးဋ္ဌာနမှ သိရသည်။